Waxaanu Waraysi la yeelanay isku dubaridihii iyo xidhiidhiyihii xafladii lagu soo dhawaynayay Dowlada Soomaaliya ee ka dhacday Ottawa, Canada.  Faarax Maxamuud Aw-Cismaan isla markaana ah asaasaha iyo gudoomiyaha ururka lagu magacaabo Saaxiibada Kanada ee Soomaaliya. (Canadian Friends of Somalia)

Faarax Maxamuud Aw-Cismaan

Waraysigiina wuxuu u dhacay sidan:

Su’aal: Faarax warbixin kooban naga sii sidii aad barnaamijkaan ku bilowdeen iyo sida uu ku dhamaaday?

Jawaab: Barnaamijkan ulajeedadiisu waxay ahayd mid caam ah iyo dan Soomaaliyeed, waxay ahayd sidii loo taageeri lahaa Dowlada Curdinka ah ee Soomaaliya u dhalatay, Waxay ahayd sidii aanu Dowlada Kanada uga dhaadhicin lahayn inay taageero aqoonsi, kaalmo, mid maadi iyo macnawiba ula garab istaagi lahayeen dowlada u dhalatay Soomaliya.  Sida aad adiguba goobtii xaflada ku aragtay waxaa xaflada ka soo qayb galay madax aad u fara badan iyo xubno ka tirsan Baarlamaanka Canada , xubnahaasi oo dadka hortooda ka muujiyay inay nagu ayidi doonaan mashruucaan lagu taageerayo Dowlada Soomaaliya, sidoo kale waxaa barnaamijka ka soo qayb galay safiiro ka socda dowladaha taageerada buuxda la garab istaagay dib u heshiinta Soomaaliya sida, Sweden, Itaaliya , Shiinaha, Kenya, Uganda, Itoobiya, Sudan, Eretereeya, Masar iyo Maraykanka.

Gabagabadii barnaamijka waxaan oran karaa wuxuu u dhacay sidii aanu u qorshaynay iyo si ka sii fiicanba, taas mahadeedana waxaa leh marka Hore Allah, marka xigana dadkii nagala qayb qaatay. 

Su’aal: Faarax ma jiraan cid ka baxsan ururkiina oo howshaan idinkala qaybqaatay?

Jawaab:  Haa oo way jiraan wayna badan yihiin dadka iyo ururada nagala qayb qaatay howshaan iyada ah, waxaa ka mid ah ururo badan oo reer Toronto ah iyo ururo kale oo reer Otaawa ah kuwaas oo kala ah:

Ottawa:

World Somali Congress
Canadian Friends of Somalia
Ogaden Human Rights Committee (OHRC)
Somali Centre for Family Services
Arladun  Somali Canadian Society
Horn of African Women’s Organisation (HAWA)
Somali Teachers Association
Dr. Umad Foundation

Toronto:

Somali Relief Network of North America
Somali Canadian Association of Etobicoke
Family Support & Youth Services of Etobicoke (Etobicoke)
Somali Immigrant Aid Organization
Midaynta 
Dejinta Beesha
Moon Light Trading Company 

 Intaas waxaa sii dheer shakhsiyaad aad u tiro badan oo nagu ayiday howshaan sida kuwa ka soo safray Toronto iyo Montreal, kuwa lacagta noogu deeqay, dumarka raashinka noo soo kariyay, hablaha dadka u adeegay , wiilasha gaadiidka naga gargaaray.  Dhamaan cidkasta oo nagala qayb qaadatay howshaana way ku mahadsan yihiin, waxaanan oran karaa arintaani waa waajib dusha naga wada saaran maadaama aanu nahay muwaadiniin Soomaaliyeed. 

 Sidoo kale waxaa xusid mudan howsha inay nagala soo qayb galeen xafladan shakhsiyaad ka socday saxaafada dalkan iyo mida Soomaaalidu maamusho sida, Muuqaalka Soomaalida TV ee Toronto, markacadeey.com, mudugonline.com iyo somaliaonline.com, dhamaantiid mahadsanidiin.

 Su’aal:  Faarax ma sii wadaysaan arintaan iyada ah mise waa mid ku koobnayd xafladaan oo qudha?

 Jawaab: Walaal, fari kama qodna faanoole, howshaani waa bilow, wajiyo badan oo isdaba joog ah ayay leedahay.  Qorshayaal dhow iyo kuwo dheer ayay leedahay sida:  inaanu Kanada ku casuno madaxda iyo mas’uuliyiinta Soomaaliyeed, Inaanu sii xoojino xiriirka labada dowladood, inaanu ka shaqayno sidii safaaradii Soomaliyeed ee Canada dib loogu furi lahaa, sidii aanu xubno ka socda baarlamaanka Kanada u gayn lahayn ama ugu casumi lahayn gudaha dalka Soomaaliya. Iyo sidii aanu hay’adaha deeqda bixiya ee reer Kanada uga dhaadhicin lahayn inay ka qayb qaataan dib u dhiska iyo dib u heeshiisiinta Soomaaliyeed.

 Su’aal: Cidii inay idinla soo xidhiidho ama idin la shaqayso doonaysa, ama inay hesho cajiladii video-ga ahaa ee habeenkaasi goobta laga duubay, ma jirtaa meel ay idinkala soo xidhiidhi karto?

 Jawaab: Walaal ururkayagu wuxuu leehayay bog internetka ah kaas oo cinwaankiisu yahay www.canadianfriendsofsomalia.org sidoo kale qofkii email-kayaga doonaya wuxuu nalaga soo xidhiidhi karaa: canadianfriendsofsomalia@yahoo.com

 Su’aal: Ugu danbaystii maxaad u soo jeedin lahayd Jaaliyadaha Soomaaliyeed ee ku dhaqan dalka dibadiisa?

Jawaab: Waxaan odhan lahaa ku dadaala sidii aad u garab istaagi lahaydeen dowladaan inoo dhalatay, hadiiba ragii qoryaha isku haystay maanta heshiiyeen islana shaqaynayaan, dhamaantoodna ay ka mid noqdeen maamulkan cusub, waxaa ila haboon inayku ku qanacno habka wax u socdaan. Maanta waxa tacliin, khibrad maamul iyo maarayna  waxa haya waa dadka dibada jooga sidaa awgeed waa in aynu dalkeena hooyo ugu taba rucnaa wax kasta oo aynu awoodno. Hadii aynaan awoodi karin anaynu ku noqono oo wax ka dhisno dalkeena waxaa inoo furan inaynu dibada ka taageerno, ha ogaado qofkasta rag iyo dumarba inaynu nahayn safiiro matalaya Soomaali magaceed, sidaa awgeed waa inaynu isku xidhno dalka hooyo iyo dalka aynu maanta hoyga ka dhiganayno.  Ugu danbaystii waxaan oran lahaa maskaxdii iyo aqoontii , dhalintii iyo dhaqaalihii intaba dibad ayuu ku sugan tahaye ku fekera sidii aynu dalka dib ugu celin lahyn.

Dowlada Cusubna waxaan odhan lahaa Muwaadiniinta iyo Jaaliyadda Soomaaliyeed u saamaxa inay dalka wax ka dhisaan, u ogaalada inay maamulka ka mid noqdaan, qadariya khibaradahooda iyo aqoontooda, xoogii hadaad tihiin maskaxdii ayaanu nahaye aynu isku kaashano kana wada shaqayno badbaadada dalka hooyo.

Waad ku mahadsan tahay wakhtigaaga aan noo saamaxday iyo waraysigaba.

Idinkaa Mudan.

 Mohamed Gabanow
Mudugonline.com
Ottawa, Canada