Siyaasadda Kuuba waxay Afrika soo tiigsanaysay tan iyo bilowgii sanadihii 1960-aadkii. Sanadkii 1964-kii wixii ka horeeyay, Kuubaanku waxay qaaradda ka daneynayeen dalka Jasaa’ir oo keliya. Waxay gacan siiyeen kacdoonkii weynaa oo ay dadkaasi isaga xoreeyeen gumeysigii Faransiiska. Markabkii ugu horeeyay ee sidey kaalmo ka timid dalka Kuuba, wuxuu Jasaa’ir soo gaaray bishii disember 1961-kii. Markabkaas oo ku soo hakaday degmada Kaasablanka (Marooko) ayaa waxaa saarnaa hub fudud iyo rasaas. Wuxuu ku laabtay Kuuba isaga oo sida 76 qof oo dhaawac ah iyo 20 kamid ah caruurihii ay dhaleen qoysaskii jabhadiinta ahaa.(Piero Gleijeses, "Cuba’s First Venture in Africa: Algeria, 1961-1965," Journal of Latin American Studies (February 1996), 159-95).

Kaalmadaasi waxay ahayd mid sii xoogowda madax-bannaanidii dabadeed.

Khilaaf ciidameed oo Marooko iyo Jasaa’ir ku dhex maray xuduudda, bishii disember 1963-kii, Kuubaanku waxay keeneen dhanka Jasaa’ir ciidan dhan 686 nin.

Ciidamadaasi kuma eeyan guuleysan in ay Afrika ka qotomiyaan aragtidii ay soo ay ku riyoonayeen in ay qaaradda u soo waaridaan. Falkoodii wuxuu noqdey mid safxadaha taariikhda meel gaaban kaga xusan. Waayo cimilo eeyan waxba kala socon, loogana itaal roonaa, ayay damceen in ay wax ka bedelaan. Dadweynuhuna diyaar uma uusan ahayn hiillada aragtidan. Ciidankii Che Guevara, badankood waa la laayey, isagiina waa uu sigtay. Dabadeed wuxuu ku khasbanaadey in uu dib ugu soo laabto Tansaaniya bishii nofember 1965-kii. Ciidankii Jorge Resquet, ee ku sugnaa Koongo-Baraasifiil, waxay ka badbaadeen afgembi lagu dhigay dowladdii ay martida u ahaayeen, bishii juun 1966-kii. Kadib markii ay dib u laabteen, Jorge Resquet wuxuu ahaa ninka dowladdii Kuuba ka dhaadhiciyay in Koongo eysan jirin kacdoon dadweyne oo iyaga uga baahan in ay cududeeyaan.

Casharkaas ay madaxdii Kuuba qaadatay ayaa wuxuu keenay in uu gaabis ku yimaado siyaasaddoodii ahayd dhoofinta aragtida kacaanka. Sidaa darteed illaa iyo 1974-kii, xiriirka ay la lahaayeen qaaradda, qeybteeda saxaraha ka hooseysa, wuxuu ku ekaa taageero xadidan oo ay u fidineysay dhaqdhaqaaqyadii gobanimo-doonka ahaa ee ka jirey dalka Geni-Bisaw, kaas oo la oran jirey Partido Africano da Independencia da Guniea e Cabo Verdo (PAIGC). Taakuleynta qalabka iyo daawada ka sokow waxay sanad walba u soo diri jireen illaa iyo 60 nin oo tababar siiya, mararna ka qeyb-qaata howlaha dagaalka. Ragga xilligaas la soo dirayay ayaa dhamaantood waxay ahaayeen kuwo naftooda hurayaal ah oo aanan khasab ku soo bixin, isla markaasna raaskoodu madow yahay.

Sanadkii 1974-kii, shaxdii Kuuba ee qaaradda waxay u wareegtay dalka Angoola. Kacaankii ka dhacay dalka Burtuqaal Cornation Revolution, 25/ 4- 1974-kii, wuxuu soo af-jaray maamulkii keligi taliska ahaa ee halkaa ka jirey. Kacaankaasi wuxuu isbeddel ku keeney siyaasaddii dibadda ee dalka Burtuqaal, taas oo markii hore saamaxaysay nadaamkii ahaa haraagii gumeysiga ee qaaradda Afrikaka. Gobollada ku danbeeyay gacanta Burtuqiiska waxay ahaayeen Angoola iyo Musambiig. Waxaa halkaa u fadhiyay maamullo gumeysi ah. Angoola oo ay Kuubaanku ku soo hor-mareen, waxaa xilligaas ka jirey saddex jabhadood oo gobanimo-doon ahaa. Popular Movement for the Liberation of Angola (MPLA), waxaa madax u ahaa Agostino Neto. National Front for the Liberation of Angola (NFLA), waxaa madax u ahaa Holden Roberto. National Union for the Total Independence of Angola (UNITA) waxaa madax u ahaa Jonas Savimbi. Jabhadahaas ayaa dowladdii cusbeyd ee Burtuqiiska waxay kula heshiiyeen in ay dhistaan dowlad ay u dhanyihiin oo ku-meel gaar ah inta ay madax-bannaanida qaadanayaan tan iyo 11/ 11- 1975-ka. Dabadeed in doorasho loo qabto oo dalku barlamaan iyo dastuur uu yeesho.

Iyaga oo raad-raacaya hida-siyaasadeedka u caadada ah hogaamiyayaasha qaaradda, ayaa intaanan la gaarin wakhtigii madax-bannaanida loo qabtay, madaxdii jabhadaha waxaa ka dhex abuurmay loolan xukun doon ah. Jabhadda MPLA ayaa waxay ku guuleysatey in ay dowladaha Hantiwadaaga ah ka hesho kaalmo wax ku ool ah oo damac geliya in ay talada dalka ku kelisato. Taasina waxay ka danbeysay markii ay Kuuba u keentay qalab lagu tababaro 5.300 oo qof. Qalabkaas ayaa wuxuu isugu jirey dhar,raashin, teendhooyin iyo daawo. Waxaa weheliyay hub ay kamid ahaayeen 12.000 qori nooca la yiraahdo Czech Rifles ee sancadoodu tahay Kuubaan. Markaas ay howshu bilowga ahayd, hubka ay Kuubaanku bixiyeen lama socon hub sancadiisu tahay Soofyeeti, maxaa yeelay waxaa jirey heshiis ay labada dowlad dhigteen 1965-kii oo lagu xusay in Kuuba eeyan hubka Ruushka u gudbin dowlad saddexaad illaa ay ogolaansho ka hesho dowladda Soofyeetiga. Ku-xigeenka wasiirkii difaaca Kuuba Diaz Arguelles oo arintaa ka hadlay wuxuu yiri :

" Hubka aanu xilligaas bixinay waxaa weheliyay lacag gaareysa 100.000 oo doollar iyo 480 tababare oo Kuubaan ah. Xeryihii tababarka ayaa markaas waxaa loo bixiyay Centros de Instruccion Revolucionaria (CIR). Halkaas, Kuuba waxay MPLA ku siisay taakuleyn shan jeer ka weyn codsigii ay na weydiisatay. ........ Waa barnaamijkii ugu ballaarnaa oo aanu fulino. Wakhti yar ayaanu xaalad qalafsan ku shaqeynay, iyadoo eeyan jirin khibrad iyo aqoon aanu u leenahay dalka ". (Díaz Argüelles to Colomé, 15 October 1975, 5, 9-11, 12, CID-FAR. See also MINFAR, "Composición de fuerzas y medios de la unidad incluyendo el incremento del Punto 4," n.d. [late October 1975]).

Dabadeed dagaalkii waa uu ballaartay oo waxaa ku soo biiray ciidamo ka socda dalka Zair oo xuduudda waqooyi ka soo tallaabay iyo kuwo kale oo ka socday koonfurta Afrika oo xuduudda koonfureed ka soo tallaabay. Ciidamadaas ayaa waxay u hiilinayeen labadii jabhad ee kale (NFLA iyo UNITA). Kadib markii dowladdii Kuuba ay ku cuslaatay in ay ciidamo badan ka soo tallaabiso badweynta Atlantiga, howlihii daad-gureynta ciidamada Kuuba, waxaa la wareegay wasaaraddii gaashaan-dhigga ee Midowga Soofyeeti. Sidaas baa mindiyihii loo afeysatay dagaalkii qaboobaa, gowracoodii ugu horeeyay ee qaarada Afrika, waxaa nasiib u yeeshay in la saaro dalka Angoola. Waxaa dalkaasi u bilowday hoog iyo halaag ay boqollaal kun oo naf ah ku baxeen.

Xiriirka Kuuba iyo geeska Afrika, sida uu ku bilowday, wuxuu ahaa mid ka qaboobaa kii Angoola. Saraakiishii Soomaaliyeed ee taladii dalka la wareegay, markii ay qaateen aragtida hanti-wadaaga ah, waxay markiiba is-tusiyeen in ay raadka gumeysiga ku baabi'in karaan is-kaashiga dadyowga hanti-wadaaga ah. Isla aragtidaasna ay kula diriri karaan xoogagga hanti-goosiga ah ee caalamka ka dhisan. Taas ayaa u asaas ahayd xiriirkii diblomaasiyadeed ee Soomaaliya iyo Kuuba ay yeesheen sanadkii 1971-kii. Muddo gaaban dabadeed Kuubaanku waxay Soomaaliya keeneen macalimiin, takhaatiir iyo farsamo-yaqaano badan. Waxaa intaa weheliyay khuburo iyo tababarayaal ciidameed. Isla markaas waxay dalkooda u qaadeen ardey Soomaaliyeed oo ay siiyeen deeq waxbarasho oo isugu jira rayid iyo ciidan. Dowladda Kuuba waxay ahayd midda ka dambeysay dhismihii iyo hagaajintii ciidamadii la oran jirey Guul-wadayaal.