Ayaamo ka hor intuusan fadhiga Cadan dhicin, dowladda Soomaaliyeed waxay dirtay wafdi ka kooban lix nin oo isugu jira saddex ay saraakiil ahaayeen saddexna rayid. Waxay u dirtay afar dal oo Afrikaan ah. Wafdiga wuxuu sii qaaday dhambaal qoraal ah oo ay ka sideen madaxweyne Maxamad Siyaad, kaas oo ku socday madaxda dalalka ay booqdeen. Axmad Maxamad (Siilaanyo) oo markaas ahaa wasiirka ganacsiga ayaa hor kacayay wafdiga. Dalalka ay booqdeen waxay ahaayeen Ugaandha, Musambiik, Koongo (Brazzavilli) iyo Madagaskar.

Marka laga reebo dalka Koongo, wafdiga Soomaaliyeed waxay la kulmeen madaxweynayaashii dalalkaas. Dhambaalka ay gudbiyeen waxaa ku qornaa xog-waran ku saabsan Jabhadda Gobanimo-doonka Soomaali Galbeed (WSLF), in ay tahay mid u halgameysa madax-bannaani. Haddana in badan oo dhulkeedii kamid ah ay gacanta ku hayso. Isla dhambaalkaas ayuu madaxweynaha Soomaaliyeed ku codsaday in madaxda Afrika ay garab is-taagaan jabhaddaas.

Saddex hoggaamiye oo dhambaalku gaaray ayaa si toos ah u diiday codsigii Soomaalida. Kuwaasi waxay ahaayeen madaxweynihii Ugaandha Iidi Amiin, kii Mosambiik Samoro Machel, iyo kii Madagaskar Didier Ratsiraka. Madaxdaas ayaa dhamaantood waxay ahaayeen rag gacan-saar la lahaa Soofyeetiga oo dalalkooda ku hoggaaminaya mabaadiida hanti-wadaagga ah. Madaxweynihii Koongo Marien Ngouabi, nasiib-darro ayaa heshay. Wafdigii Soomaaliyeed oo ku sugan magaalo-madaxdii, iyaga oo aanan weli la kulmin madaxweynaha, ayaa waxaa dalka ka dhacay af-gembigii lagu dilay madaxweyne Ngouabi (waxay ahayd 17/ 3- 1977). Waxaa taladii la wareegay Joachim Yhombi Opango. Wafdigii Soomaalida waxay dalkaas ka dhoofeen iyaga oo aan cidna la kulmin.

Fadhigii Xiddigta Cas ayaa wuxuu ku beegnaa socdaalka wafdigan. Sida aanu ka soo sheekeynay, fadhigaasi wuxuu dhamaaday isaga oo Fidel Castro uu ku fashilmay muhimaddii uu kulanka u qabtay. Laakiin wuxuu ka tegey, sida goor danbe la fahmay, erey mudnaa in madaxda Soomaalidu ay qiimeeyaan, kaas oo ahaa :

" Inkasta oo aan qabo wal-wal weyn, misana ma aan filayo, muranka u dhexeeya labada dowladood in uu sabab u noqon karo dagaal ka dhex dhaca labada shacab. Maxaa yeelay, dagaalku wuxuu dabada ku wataa waxyaabo adag ". (Minutes of the Conversation between Comrade Erich Honecker and Comrade Fidel Castro. Sunday, 3 April 1977. House of the Central Committee).

Ninkaasi waa uu ku dadaalay in uu degaanka ka badbaadiyo hoogga iyo ba'a la xiriira dagaalka ku soo food leh. Islamarkaa, isagu wuxuu ahaa nin goobayay caal-hel uu Itoobiya kaga badbaadiyo mashaqada culus ee kaga soo socota dhanka Soomaaliya. Kalsoonida muuqatay ee uu u muujiyay rijiimkii shuuciga ahaa ee ka curtay Itoobiya iyo dadaalka uu u galay in uu ku badbaadiyo nadaamkaas, ayaa wuxuu ceeryaamo kala dhex-geshay shakhsiyaddii Castro iyo madaxdii Soomaalida. Sidaa darteed, fadhigii Cadan ma noqon mid hakiya damacii ay dagaalka u qabeen raggii waayeelka ka ahaa maamulka Soomaaliya.

Sida aanu arki doono, waxaa halkaas yaal il-duuf siyaasadeed kaas oo natiijadiisu eeyan Soomaali mahadin. Inkasta oo madaxda Soomaalida ay xilligaas qaadeen tallaabo ay ku helaan saaxiibo cusub oo laysku halleyn karo, misana waxaa aad uga dahsoonaa khatarta ay leedahay in lala colloobo is-bahaysiyada caalamka ee xoogga weyn. Saadaasha iyo mala-awaalka hoggaankii Soomaaliya, wuxuu ahaa mid aanan la socon qaab-dhiska saldhigga u ah aragtiyaalka lagu ilaaliyo danaha dowladaha carri-edeg iyo xirfadaha ay diblomaasiyaddu leedahay.

Waxay aragtidoodii ku koobeen fursad markaa u muuqatay oo ahayd in Itoobiya laga aarsado oo dhulkii ay boobtay laga soo ceshado. Shacabka iyo ciidamada oo si buuxa ula qabay qodobka ah xoreynta dhulalka maqan ayaa waxay ahaayeen mid kuwo maqan taladoodii, waayo hoggaanku wuxuu ahaa mid xafiis qura looga taliyo oo waa xafiiskii madaxweynaha.

Hadalka uu yiri Fidel Castro, macnaha uu xambaarsan yahay waxaa weeye, haddii ay Soomaaliya doorato in ay dagaal qaaddo, markaas dowladaha hanti-wadaagga ah waxay taageerayaan Itoobiya. Sidaasna wuxuu ka muujiyay fadhigii uu la qaatay madaxdii Jarmalka Bari oo uu u tegay fadhigii Cadan dabadeed. Fidel Castro, ayaa markaa yiri sidan :

" Haddii kaalmadayada aanu siino Itoobiya, markaas Siyaad Barre ma uu lahaan doono anshax xaq ah oo uu nagu eedeeyo. Si cad ayaan ugu sheegay in Itoobiya uu ka jiro kacaan. Sidaa darteed waxaa nagu waajib ah in aanu kaalmeyno Itoobiya ". (Transcript of meeting between East German leader Erich Honecker and Cuban leader Fidel Castro, East Berlin, 3 April 1977 -excerpts-).

Madaxdii Itoobiya, iyagu madashii fadhiga waxay kala tageen dareen isku dhafan oo isugu jira guul iyo guul-darro. Dhan waxaa u muuqatay in ay fadhigii ka soo hoyeen guul siyaasadeed oo ay ku hanteen kalsoonida dowladaha hanti-wadaagga ah. Kuwaasi waxay ahaayeen cududda keliya oo ay filayeen in ay ka helayaan hiillo buuxda. Dhan kale, Itoobiyaanku waxay ogaayeen, ku kala-kaca fadhiga in micnihiisu yahay dagaal furan oo ay is-wajahaan ciidamada Soomaaliyeed. Taasina hadday dhacdo, waa ay maleynayeen in lagaga gacan-sareynayo.

Maantii xigtay maalintii fadhiga lagu kala kacay, waxaa kulmay Gaashaanle Berhanu Bayeh iyo qunsulkii Ruushka S. Ia. Sinitsin ee fadhiyay Addis-ababa. Hadalkii ay is-dhaafsadeen ayaa wuxuu kamid yahay ilaha laga qaato ogaallada la xiriira taariikhdii dagaalkan. Gaashaanle Berhanu oo xubin ka ahaa golihii Dergo ayaa qunsulka u sheegay in fadhigii Cadan uu ku dhamaaday natiijo la'aan. Wuxuuna taas sabab uga dhigay halka uu Siyaad Barre ka istaagay dooddii lays dhaafsanayay. Sida uu qunsulku goor danbe ku war-bixiyay, hadalladii Berhanu Bayeh waxaa kamid ahaa sidan :

" Madaxweynaha JDS (Jamhuuriyadda Dimoqraadiga Soomaaliya), si islaweyni leh ayuu Itoobiya ugu sheegtay dhul, isaga oo Itoobiya ku magacaabay xoog gumeysi ah. Wuxuuna caddeeyay in uu wadayo siyaasaddiisa ku wajahan xiriirka Itoobiya, inta Soomaali dhamaanteed eeyan haysan madax-bannaani. Siyaad Barre ma uusan xushmeyn Mengistu H. Mariam, si fool-xun buu ugu sheegay in uu isagu yahay mid xambaarsan siyaasad lamid ah tii Xayle Selaesse. Hoggaamiyaha Soomaaliyeed waxaa kale oo uu sheegay, haddii Itoobiya ay isu ogtahay in ay tahay dowlad hanti-wadaag ah, markaas waa in gobolka Ogaadeenya ay si degdeg badan ugu wareejisaa JDS.

Si loo xasiliyo xiriirka Soomaaliya iyo Itoobiya, Siyaad Barre wuxuu soo jeediyay in labada dal laga abuuro maamul kon-federaal (Confederation) ah, kaas oo lagu jaangooyay qowmiyad. Taasi waxay gogol u tahay in Itoobiya ay Ogaadeenya ku wareejiso Soomaaliya. Ra'yigaas waxa diiday maahayn Mengistu oo keliya. Bal Fidel Castro iyo Saalim Rubeyc qudhoodu waxay muujiyeen in ay ka soo horjeedaan arintan oo ay ku tilmaameen in Siyaad Barre uusan xataa iyaga xushmeyn ".

(TOP SECRET. Copy No. 2. From the journal of Sinitsin S. Ia. Memorandum of Conversation between Soviet Acting Charge d' affaires in Ethiopia S. Sinitsin and Ethiopian official Major Berhanu Bayeh. 18/ 3- 1977). Berhanu Bayeh wuxuu sheegay, madaxweynaha Soomaaliyeed in kulankaas uu ku caddeeyay, dowladaha hanti-wadaagga ah, haddii ay doonayaan in ay xiriirka u jaraan Soomaaliya, in ay taasi tahay mid iyaga u taal.

Dad-weynaha Soomaaliyeed, iyaga ayaa curiyay kacaankooda, iyada oo aanan dibadda laga taageerin. Haddaba haddii dowladaha hanti-wadaagga ahi ay diidaan in ay Soomaalida ku kaalmeeyaan qadiyaddoodaan, markaas dowladaha dib u-socodka ah ayaa kaalmeynaya ayuu yiri Maxamad Siyaad. (Isla marjicii hore).

Fadhigii Cadan ka dhacay, wuxuu ahaa barta ay ku dhilqatay siyaasaddii xasilloonayd ee xiriirineysay is-bahaysiyada waaweyn ee dunida ka jirey iyo dowladaha geeska Afrika, gaar ahaan Soomaaliya iyo Itoobiya. Labada quwadood ee dunida ugu xoogga weynaa (USSR iyo USA) ayaa markaas midba ay dhankeeda ka bilowday tallaabadii ay ku meel-beddelan lahayd. Diblomaasiyaddii Soofyeetiga ayaa bilowday in ay u iilato dhanka Itoobiya. Taas oo markeedii horeba, xiriirkii ay la lahaayeen Soomaaliya ay ujeeddadiisu ahayd baadi-goob hadaf fog oo ay ku doonayeen in ay ku gaaraan Itoobiya iyo Afrika inteeda kale. Mareekanka ayaa isna qaaday tallaabo lamid ah shaxdii uu Soofyeetiga ku horeeyay. Sida aanu arki doono, madaxda aqalka Cad, waxay guddoonsadeen, maadaama uu xumaaday xiriirkii ay la lahaayeen Itoobiya, in ay ku agaagaan Soomaaliya. Dabadeed ay halkaas kala diriraan hannaanka shuuciga ah ee ka curtay Itoobiya iyo hadafka uu leeyahay saaxiibka weyn (USSR) oo ay dhabarka ku hayaan. Qorshahaas, Mareekanku waxay kaga deydeen Ruushka, waana ay ku guuleysteen.

Sida aanu soo xusnay kala-kaca fadhigan wuxuu dabada ku watay arimo badan oo ay ugu weyn tahay kor u-kaca gulfyada colaadeed oo ay Soomaalidu la maagganaayeen Itoobiya. Inkasta oo ay dowladda Itoobiya ahayd midda ugu cabsida badnayd, misana waxaa wal-walka la qabay dowladaha hanti-wadaagga ah oo uu Ruushku ugu horeeyo. Isla arintaa ayaa waxay ahayd qadiyad ay Soomaalidu u awlax tumanayeen tan iyo maantii ay madaxa-bannaanida qaateen. Dowladdii Itoobiya waxaa soo food saaray khatar keeni karta in ay ka tir-tiranto joqraafiga dunida. Maahayn hubka uu Midowga Soofyeeti siiyay Soomaalida oo keliya midka halista ku hayay, bal urursanaanta shacabka Soomaaliyeed iyo hanka xooggan oo ay ku doonayeen in dadkooda iyo dhulkooda ay isu soo urursadaan ayaa waxay ahayd qodob ka hilan culus kaas hore. War-bixintii uu qunsulka Ruushku ka helay Berhanu Bayeh waxaa kamid ahaa sidan :

" Natiijooyinkii kulanka, sida uu Berhanu Bayeh sheegay, dood kama taagna in madaxda Itoobiya ay rumeysan yihiin in kulankan uu Itoobiya u ahaa guul diblomaasiyadeed. Sida la arkayay madaxda Kuuba iyo Yamanta Koonfureed waxaa u muuqatay meesha ay Soomaalidu taagan yihiin. Maahan oo keliya mowqifkooda ku wajahan Itoobiya, bal waa mowqifkooda ku wajahan halganka guud ee lagula jiro imberiyaaliyadda iyo dib u-socodka.

Sida uu qabo Berhanu Bayeh, wuxuu yiri : Waxaa kale oo jaalayaashaya Kuuba u muuqatay, meesha heshiis la'aanta ah ee uu Siyaad Barre ka istaagay la kulankii Mengistu, in ay u sabab tahay taageero ah ballanqaad la hubo oo uu dhowaan ka helay dowladaha Carbeed ee dib u-socodka ah. Madaxda Itoobiya, sida ay u qiimeeyeen fadhigaas, Berhanu Bayeh wuxuu hadalkiisii ku daray : Waa muuqataa natiijadii fadhiga Cadan dabadeed, in ay suuragal tahay malaha ah in uu bilowdo howlo adag oo ka dhan ah Itoobiya. Dhaqdhaqaaqaas ayaa wuxuu yahay mid ay Soomaalidu wadaan. Waxaa ku weheliya dowladaha Carabta dib u-socodka ah .................................. Hoggaanka golaha ciidanka (ee Itoobiya) waxay indhaha ku hayaan kooxaha ciidamada Soomaaliya oo soo guda-gelaya gobolka Ogaadeenya. Kuwaas oo hadda isu beddelay ciidamadii rigliga ahaa oo ku lebisan dhar rayid ah, islamarkaa sita hub casri ah ". (Isla marjicii hore).

Gaashaanle Berhanu oo sii wada war-bixintii uu qunsulka siinayay wuxuu yiri :" Sidaasi waxay ka muuqatay cimilada adag ee iska hor-imaadka ciidameed ee hadda ka jira degaanka Harar iyo Jigjiga. Taasina waxay ka dhalatay abaabulka Soomaalidu wadaan oo lala beeganayo gaadiidka ciidamada Itoobiya. 17-kii maarso, dayuurad ah kuwa dagaalka oo nooceedu yahay MiG 21, oo ay Soomaalidu leeyihiin ayaa ku soo xad-gudubtay ciidda Itoobiya. Duulimaadkaas oo ahaa fal daan-daansi, ayaa waxay ku soo gaartay agagaarka degmada Jigjiga. ................................. ". (Isla marjicii hore).

Dabadeed Berhanu Bayeh, oo ahaa ku xigeenkii Mengistu, wuxuu ka codsaday qunsulka Ruushka in uu madaxda Midowga Soofyeeti u gudbiyo dalab ay codsanayaan saraakiisha golaha sare ee Itoobiya. Dalabkaasi wuxuu ahaa codsi ah in dowladda Soofyeetigu ay ku dhaqaaqdo tallaabo kasta oo suurogal ah oo ay ku hakinayaan dadaalka ay Soomaalidu ugu jiraan in ay ku soo duulaan Itoobiya. Wuxuu hadalkiisii raaciyay in ay uga mahad celinayaan Soofyeetiga khabar kasta oo uu soo gaarsiiyo Itoobiya oo la xiriira arintan. (Isla marjicii hore).

Sida ka muuqata, dhambaalka sarkaalkan wuxuu gudbinayaa risaalad caal-waa ah, kaas oo tilmaamaya wejiga qarsoon oo ay umadda Soomaaliyeed leedahay. Weji leh haybad iyo qaddarin, marka uu gurigu u hagaagsan yahay. Kaas oo ka duwan kan maanta lagu bartay ee maangaabka iyo makastadu ka taliyeen. Codsigii Berhanu Bayeh ayaa la filayaa in markiiba uu gaaray Moosko. Diblomaasiyaddii Ruushka ma eeyan la daahin in codsiga Itoobiya ay kaga jawaabto qaabkii ay ula muuqatay. Si ay u badbaadiyaan dowladda ay caashaqeen ee Itoobiya, waxay Soomaaliya u soo direen wafdi uu hoggaaminayo madaxweynihii dowladdii Midowga Soofyeeti Nicolay V.

Podgorny. Ninkan iyo wasiirkii difaaca ee Soofyeetiga Marshal Sergey Grejko ayaa waxay ahaayeen laba nin oo la caadifad ah Soomaalida iyo madaxdooda. Sida laga wariyay saraakiil sare oo kamid ahaa ciidamadii Soomaaliya, labadan nin ayaa mahad ku lahaa in Soomaalidu ay Ruushka ka helaan hub casri ah oo la'aantood eeyan heleen.

Sidaa darteed Ruushka kuma eeyan khaldanayn in xilligaas xasaasiga ah ay Xamar u soo diraan Podgorny. Socdaalka madaxweynahan wuxuu kaloo ahaa risaalad uu Itoobiya ugu raadinayo hiillo caalami. Wuxuu ku hor maray dowlado Afrikaan ah, oo kamid ah kuwii la oran jirey dowladaha safka hore. Waa dowladihii xuduudda la lahaa Koonfur Afrika oo markaas ay ka talinayeen caddaan tira yar. Dowladaha uu booqday waxay ahaayeen Saambiya iyo Muusambiik. Wuxuu kaloo booqday dalka Tansaaniya. Kasokow xiriirka u dhexeeya dalalkuu wafdigu booqday iyo Soofyeetiga, Podgorny iyo madaxdii Afrika ee uu u martiyay, waxaa dhex-maray dood aanan la faafin. Waxay ku saabsanayd xaaladda qallafsan ee geeska Afrika. Dowladahaas Afrikaanka ah waxay kamid ahaayeen kuwii la meereysanayay siyaasadda Ruushka. Sidaa darteed Podgorny wuxuu ka doonayay in ay Itoobiya la mowqif noqdaan. Qoraal laga diyaariyay socdaalkii N.V. Podgorny baa wuxuu ahaa sidan :" ................................. Muddadii uu socday wada-hadalku, waxay ka doodeen aragtiyaal la xiriira xaaladda geeska Afrika, iyaga oo si gaar ah u eegay xiriirka sii xumaanaya ee Itoobiya iyo Soomaaliya. Madaxweynayaashii Afrika, gaar ahaan Nyerere (Tansaaniya) iyo Machel (Mosambiik), waxay caddeeyeen sida ay uga wal-wal qabaan cadaawadda sii xoogoobeysa ee ka dhex aloosan labada dal ee hor u-socodka ah. Waxaa kale oo ay wal-wal ka muujiyeen, iyaga oo ka xun, kobta cadaawadeed oo madaxda Soomaaliya ay ka taagan yihiin rejiimka kacaanka ah ee Itoobiya. Aragtida uu Nyerere qabay, saadaasha mustaqbalka, ma jiro qof mala-awaali kara in la xasiliyo xiriirka saaxiibtinimo ee Soomaaliya iyo Itoobiya. Arinta ugu weyn oo wax laga qaban karo waxay tahay in loo dadaalo sidii loo fogayn lahaa dagaal dhex-mara Itoobiya iyo Soomaaliy. Taasina waxay ku imanaysaa qanaacad ay labada dhinac ku gaaraan in ay mid waliba is-qabato iyo kalsooni lays dhaafsado. Nyerere iyo Machel waxay yiraahdeen : qanaacada ay Soomaaliya ku sheeganayso dhulka, wuxuu sababayaa in uu bur-buro rejiimka hor u-socodka ah ee ka jira Itoobiya ". (Repport From CPSU CC to SED CC, Results of N.V. Podgorny's Visit to Africa, late March 1977 -excerpts- Strictly Confidential).

Waxaa kale oo qoraalkii kulankan kamid ahaa sidan :

" Dhamaan saddexda hoggaamiye waxay si xooggan u qiimeeyeen meesha uu Midowga Soofyeeti ka is-taagay arintan. Waxay taageereen aragtida ah in dowladaha hor u-socodka ahi ay kordhiyaan dadaalka lagu taageerayo kacaanka Itoobiya. Islamarkaa loo how-galo sidii looga yeeli lahaa xiriirka Itoobiya iyo Soomaaliya mid caadi ah ". (Isla marjicii hore).

Wafdigii Soofyeetiga ayaa markii uu ku laabanayay dalkiisii wuxuu ku hakaday Soomaaliya. Booqashadaas oo ahayd mid sir ah, waxay ku beegnayd labadii maalmood oo ay taariikhdu ahayd 31-kii maarso iyo 1-dii abriil 1977-kii. Nicolay Podgorny waxay kulmeen madaxweyne Maxamad Siyaad. Dooddii labada madaxweyne waxay ahayd mid ku saabsan xiriirka Itoobiya iyo Soomaaliya. Iyo xaaladda gobolkan shiddeysan oo mashaqadiisu ay la xiriirto, sida uu Podgorny ku tilmaamay, dowladaha Carabta ee dib u-socodka ah. Qoraalkii wada-hadalka labada madaxweyne waxaa kamid ahaa sidan :

" Is-dhaafsi aragtiyaal la faafiyay oo ah in hoggaanka Soomaaliya uu weli ku dheggan yahay aragtiyaalkii gaboobay ee la xiriira dhulka ay ku sheeganayso Itoobiya. Siyaad Barre wuxuu ku cilleeyay in uu jiro cadaadis gudaha ka jira oo ay wadaan kooxaha qowmiyiinta Soomaaliya. Islamarkaas, Siyaad Barre ma uusan beenin in Itoobiya uu ka jiro is-beddel hor u-socod ah. Isagu wuxuu iska fogeeyay hoggaamada waddamada Carabta dib u-socodka ah sida Suudaan, Masar iyo Sacuudiga ................................. ". (Isla marjicii hore).

Sida ka muuqata ereyada soo noq-noqday ee la adeegsanayo, dib u-socod iyo hor u-socod, waa ereyadii caalamka lagu wareeriyay xilligii uu jirey dagaalkii qaboobaa oo ay wax-magaratada durbaanka u tumeen. Waa ereyo ka dheer garashada iyo dhaqanka ay Soomaalidu wax ku kala soocaan. Ereyadaas oo ahaa kuwo lagu duudsiyay xuquuq badan ayaa waxay dhig u yihiin kuwa maanta la adeegsado oo nin dan leh intuu ku dhawaaqo, dabadeed ay maksatadu ku hadaaqaan.

Qoraalkii la xiriiray socdaalkii Podgorny, waxaa lagu soo xiray sidan :" Siyaad Barre wuxuu caddeeyay, Soomaaliya sidii ay horeyba u doonaysay in ay ballaariso wada-shaqeynta ay la leedahay USSR, bey haddabna u doonaysaa. Isagu wuxuu sheegay in uu ictibaar ku filan siinayo sidii uu u qaban lahaa fadhi uu kula kulmo Mengistu, kaas oo USSR uu ka yahay dhex-dhexaadiye. Wuxuu adkeeyay in Midowga Soofyeeti oo keliya uu yahay mid sharciyad buuxda iyo khibrad u leh howshan. Taasi waxay kaalmo u noqon kartaa Soomaaliya iyo Itoobiya si ay uga shaqeeyaan in labada dal ay helaan waddadii ay ku gaari lahaayeen musaalaxad iyaga oo aanan waxba lumin ". (Isla marjicii hore).

Maanagaa gudihiisiyo

Gobolladiisa colaadda

Galowgaa ka ciyaayiyo

Gonda dhiig leh ka yeelay

Uu na galaafanayaa

Maanagaa gubniyaal iyo

Dubaabaadka gurguurtiyo

Intaan gaas ku afuufnay

Ku garaacnay rasaasta

Dadkuu waayo gumeystay

Gibilkooda cunaayay

Haddii ay gurgurkii iyo

Godobtiiba rideenoo

In ay gaar u baaxn iyo

Xornimadooda garteenoo

Gendi kuugu dhigteenoo

Maanagaa galladdoodiyo

Goolka ay dhaliyeen iyo

Gaashaanka u heynoo
Guutadaadii ku leefnay

Gamaahiirta ku taagnay (Cali Cilmi Af-yare). Saadiq Enow

Waa socotaa.... Gadaal ugu noqo casharadii hore